Baluarte 2018
Stimadó di papiamentu i famia di Arte di Palabra, bonbiní.
Esaki ta di diesnuebe aña siguí ku Arte di Palabra kompetensia literario na papiamentu pa skol avansá, ta tuma lugá.
Durante e kompetensia final ABC, tur aña ta rindi homenahe na algun persona òf instansia ku a duna un kontribushon balioso riba tereno di nos idioma papiamentu.
E aña akí ta tira lus riba arte dramátiko na papiamentu.
E kompetensia final ABC, sinembargo ta tuma lugá e aña akí na Aruba enkonekshon ku selebrashon di nan 10 aniversario.
Na Aruba lo duna homenahe na e otro baluartenan.
Fundashon Arte di Palabra Kòrsou, a skohe Grupo di Komedia Thalia i Teatro Kadaken, komo nominadonan di Kòrsou. Komishon Arte di Palabra Aruba a nominá Mascaruba i Fundacion Muchila Creativo i Komishon Arte di Palabra Boneiru a proponé Bonaire Youth Outreach Foundation, komo baluarte.
Seguidamente nos ke pidi tur hende pa lanta para, bati man, kanta i wapa ku nos yunan di tera mientras nan ta subi podio.
Grupo di Komedia Thalia
E aña ‘ki ta hasi 50 aña, ku a funda Grupo di Komedia Thalia.
Segun Sr. Elton Lauf, presidente aktual di e organisashon:
“Ten’i su ten’ i te datu dia djawe, e grupo a sirbi komo katalisadó, pa stimulá i uni talentonan di Kòrsou den un kantidat di área. Hopi yu di tera a deskubrí nan abilidat kreativo i a haña oportunidat pa desplegá asaki”
Despues di presentashon di e obra tradusí pa May Henriquez, Maribel, den teater Dam Negropont na Asiento, e aktornan ku a presentá e obra a sinti e nesesidat pa keda huntu i lanta un grupo di komedia.
E promé presentashon di Thalia a tuma lugá den Sentro Pro Arte na 1968 ku e obra: “Mentira na Granèl”.
“Porta a habri pa eskritor i traduktor. Pa por presentá un obra, mester tin un obra promé. Mester tin persona ku tin e abilidat di pa skirbi, òf ku por tradusí obra eksistente, den nos dushi Papiamentu”, segun Thalia.
Un fuente di kreashon a habri na Kòrsou ku por ehémpel algun di e siguiente obranan: “Porta será”, “Kani mi pa mi kani bo”, “Gai bieu ta traha sòpi stèrki”, “Despensa number robes”,
“Barku riba anker”, “Cha tiger”, “Esta riku nos bida ta”, “No konfia pushi ku piská”, “Petra su kas”, “Ta ken a mata Nemesio”, i hooopi obra mas…
Thalia su meta ta pa alsa nivel di kultura i idioma. Nan ke duna kontribushon na kultura i bon papiamentu. Thalia semper a perkurá pa un tim di miembro krítiko ku e tarea pa evaluá un obra promé ku ta hasi su tradukshon òf ta disidí di presenté.
Thalia no unikamente a presentá pa públiko ku ta paga, pero na hopi okashon a presentá tambe pa muchanan di skolnan HAVO/VWO.
Thalia a presentá su obranan tantu na Kòrsou, komo Aruba, Boneiru, St. Maarten, Venezuela.
Aki un selekshon di e aktornan mes. Ta imposibel pa menshoná tur. Nos ta menshoná esnan ku den transkurso di añanan a bira parti di e famia di Arte di Palabra.
Ced ride, Orlando Cuales, Rina Penso, Ruth Zefrin, Bunchi Römer, Nydia Ecury, Elis Juliana, Jenny Fraai, Fifi Rademaker, Anthony Haile.
Thalia, danki pa boso kontribushon balioso na alsa nivel di kultura i idioma di nos dushi Papiamentu!
50 aña Thalia, motibu grandi pa selebrá.
Portrèt
