Historia di Arte di Palabra
E idea pa e evento akí a lanta serka Ange Jessurun, kende tabata konsulente di papiamentu pa formashon básiko na 1999. Esaki tabata pa selebrá e echo ku pa promé biaha den historia papiamentu a drenta enseñansa avansá komo materia obligatorio.
Na 2000 a tene e promé kompetensia pa alumno di klas 1 i 2. Na 2001 mester a amplia e kategorianan pa klas 3 i 4 tambe i djis despues a habri oportunidat pa tur hóben di skol sekundario i di klas 1 i 2 SBO partisipá.
Meta di e evento:
Promové amor pa kultura di nos idioma papiamentu.
Enrikesé nos idioma ku kreatividat di nos hubentut.
Partisipashon:
Alumno di skol avansá por kompetí riba tereno di:
Poesia
A. Poesia eksistente 1 alumno di klas 1 òf 2
B. Poesia original, skirbí pa e alumno mes 1 alumno di klas 1 òf 2
C. Poesia original, skirbí pa e alumno mes 1 alumno di klas 3-6 òf 1, 2 SBO/MTS
Kuenta kòrtiku
D. Kuenta eksistente 1 alumno di klas 1 òf 2
E. Kuenta original, skirbí pa e alumno mes 1 alumno di klas 1 òf 2
F. Kuenta original, skirbí pa e alumno mes 1 alumno di klas 3-6 òf 1, 2 SBO/MTS
Pa yega na representante di kada skol, por tene kompetensia na skol.
Partisipashon di Boneiru i Aruba
For di prinsipio a invitá Boneiru i tambe Aruba pa partisipá ya ku papiamentu ta uni e tres islanan akí. Boneiru tabata presente for di 2000. For di 2006 Boneiru ta organisá su mes kompetensia di Arte di Palabra. E deseo pa Aruba tambe partisipá a bira realidat na 2009, i for di e aña ei, Aruba tambe ta organisá su propio kompetensia.
Lugá i asistensia di públiko
E promé kuater añanan e evento a tuma lugá kuater aña na UNA, kaminda tur aña mester a desapuntá públiko, komo ku e sala no tabatin sufisiente kapasidat (200 lugá). Na 2004 a tene e preselekshon na Teatro Luna Blou, ku tambe a resultá muchu chikí. Danki na Kas di Kultura, por a tene e final na Teatro Because. For di 2005, a hasi uso di K.Center, ku a resultá adekuá pa e evento akí. Na Boneiru a tene e kompetensia e.o. den sala di Jong Bonaire i na Aruba el a tuma lugá na diferente sitio.
Premio
Kada partisipante ta haña un sertifikado di partisipashon i un regalu (un buki di FPI).
E tres ganadónan di kada kategoria ta haña un premio adishonal.
For di aña 2003 te 2010 (ocho aña konsekutivo), e seis ganadónan di e promé premio den kada kategoria a gana un biahe pa Boneiru. Di 2011 pa 2013 e ganadónan a bishitá Aruba.
Homenahe na baluarte di papiamentu: Tapushi literario
For di e promé biaha (2000), ta dediká tur aña atenshon na algun persona ku a destaká riba tereno di papiamentu. Meta di esaki ta pa konsientisá e hóbennan ku nos mester siña di e grandinan ku a indiká e kaminda.
For di aña 2002 e baluartenan ta risibí un Tapushi literario. Esaki ta konsistí di un tapushi di maishi chikí den forma di un pèn.
E siguiente personanan a risibí e premio akí:
– 2000 Mem Vornis i Maria Diwan
– 2001 Imelda Valerianus, Elis Juliana i Ruth Zefrin
– 2002 Gibi Bacilio, Jenny Fraai, Guillermo Rosario, Eddie Pieters Heyliger, Enrique Muller i Bòi Antoin di Boneiru
– 2003 Sidney Joubert, Frank Martinus, Nydia Ecury, Papa Baromeo i Linda Coffie-Frans di Boneiru
– 2004 Uchi Regina – Frans (Boneiru), Rignald Recordino, Anselmus (Bòi) Dap, Cedric Ridderplaat i Oswin (Chin) Behilia
– 2005 Veronica Mersera di Boneiru, di Kòrsou: Enid Hollander-Merkies, Ruthie Pantophlet, Richard Hooi, (Yerba Seku) i Alvin Inecia (tio Ali)
– 2006 Gabriël Mercera di Boneiru i di Kòrsou Sonia Garmers, Elia Isenia i Lucille Berry-Haseth
– 2007 Marco Marchena di Boneiru i di Kòrsou, Eligio Melfor, Anthony Jamanica, Laura Quast i Pachi Damon
– 2008 Cecilia Evertsz di Boneiru i di Kòrsou Rina Penso, Bunchi Römer, Wilfrido Ortega i Zehi Metry
– 2009 Hermanito Narvaez, Orlando Cuales, Valesca Diaz, Leo Floridas, Boeboei (Carmo) Cicilia di Boneiru i Desiree Correa di Aruba
– 2010
Kòrsou: Violet Ravenstein, Thelma Anthonia i Eric la Croes
Boneiru: Crispina Cicilia-Janga i Benita Balentien-Janga
Aruba: Munye Oduber
– 2011
Kòrsou: Ronald Severing, Rene Rosalia i Sygmund Montesant
Boneiru: Hubert Vis i di Aruba: Grupo Corector di Papiamento
– 2012
Kòrsou: Merly Augusta, Diana Lebacs, Roel Jungslager
Boneiru: Monica Clarinda i di Aruba: Olga Buckley
– 2013
Kòrsou: Aileen Looman, Victor Bartholomeus i Marta Dijkhoff
Boneiru: Akademia di Papiamentu: Gerladine Dammers
Aruba: Fundacion Lanta Papiamento: Joyce Pereira i.o.
2014
Kòrsou: Rudy Plaate, Richard Simon i Grupo Serenada
Boneiru: Calixto Coffi
Aruba: Marta Figueroa – Laclé i Maybelline Arends – Croes
2015
Kòrsou: Sra. Lusette Verboom-Fairbairn (Gallery Alma Blou), i Sindney “Mr. Saab” Isidora (Interieurtiek Saab)
Boneiru: Sra. Senaida Janga i Stichting Jeugdwerk Jong Bonaire.
Aruba: Sra. Glenda Reiziger, Departamento di Cultura Aruba i UNOCA (Union di Organisacionnan Cultural Arubano).
2016
Kòrsou: Fundashon pa Skol Humanista na Papiamentu FSHP – Frank Martinus q.e.p.d. i sra. Trudi Martinus-Guda
Boneiru: Bon Uso di Papiamentu (programa ku ta pasa 20 aña kaba na Bon FM presentá aktualmente pa Arthur Sealy.
Aruba: Mirto i Jenny Laclé
2017
Kòrsou: Noris Doran i Philip Rademaker
Boneiru: Rudolf Domacassé
Aruba: Gregorio Tromp
2018
Kòrsou: Grupo di Komedia Thalia, Teatro Kadaken
Boneiru:
Aruba: Mascaruba i Mochila Creativo
2019
Kòrsou: Renate Joe, Cesar Palacios, Arthur Tjin-Kon-Fat
Boneiru: Ubaldo Anthony
Aruba: Miriam Rosel-Koolman
Boneiru
Komo resultado di e bishita na Boneiru ku e ganadónan, kaminda semper ta tene un interkambio kultural entre e hóbennan di Boneiru i Kòrsou, Boneiru a organisá su propio Arte di Palabra na 2006. E finalistanan boneriano a partisipá na e final na Kòrsou.
E promé komishon di Arte di Palabra di Boneiru tabata konsistí di Senaida Janga di Jeugdhuis Jong Bonaire, tante Linda Coffie di Bos di Boneiru i Hubert Vis di SKAL
Jong Bonaire den persona di, entre otro, Ilona Burgers, Bila Thomas i Melvin (Shaba) Meyers a sigui karga e proyekto i garantisá partisipashon di Boneiru na e kompetensia.
Aruba
Na 2009, Aruba a tene su promé kompetensia di Arte di Palabra, i e finalistanan di Aruba tambe a partisipá na e final na Kòrsou. Desiree Correa ta esun ku a tuma e inisiativa pa kuminsá ku e kompetensia na Aruba. For di 2010 e organisashon ta den man di Grupo di Corector i Departamento di Cultura, ku komo persona di kontakto, señora Glenda Reiziger (2010 i 2011), Julie Franken-Thodé i Julie Merencia, John Freddy Montoya i Siegfried Dumfries (for di 2012 ).
Kompetensia di haiku Elis Juliana
For di 2008 a amplia e kompetensia di Arte di Palabra ku e género di haiku. A dediká e kompetensia akí na Elis Juliana na okashon di su di 80 aniversario.
Banda di e kategorianan di hóben ku ta bishitá skol, tur otro persona na Kòrsou òf pafó di Kòrsou por partisipá. For di e promé biaha, interes di e último kategoria akí ta enorme. Un hurado, bou di presidensia di Elis Juliana mes di 2008 pa 2013, a saka nuebe haiku ganadó. E haikunan ganadó a sali den vários korant. Tin plan pa publiká pronto un kolekshon di e mihó haikunan.
Prensa
For di e promé aña, Z 86 a transmití tur aña gran parti di e programa final bibu.
E echo ku for di 2002 Hermanito ta transmití e programa na kanal 80 a pone ku un públiko grandi a tuma nota di e evento. Den kurso di aña, Hermanito ta keda pasa e kompetensianan di diferente aña anterior. Tur aña, Aileen Looman ta dediká atenshon na Arte di Palabra den su programa Mòru Bondia na Telecuracao. Renate Joe ta pasa e preselekshon, e final i e interkambio kultural den su programa Solo ta sali pa nos tur for di 2009. FidE a duna atenshon na e kompetensia den su programa di televishon Nos Mundu i tambe den su programa na radio. Kas di Kultura a pasa e kompetensia den su programa di radio Pidi Boka. Na Boneiru, durante kada bishita di e ganadónan di e kompetensia , e grupo tabatin un presentashon a na Radio Bos di Boneiru den e programa di tante Linda. Bon FM di Boneiru tambe a transmití tantu e final na Kòrsou komo e interkambio kultural na Rincon bibu i direkto. Tambe e hóbennan tabata di bishita den e programa di televishon Panchito Club na Boneiru.
Na Aruba diferente radio i televishon a dediká atenshon na e kompetensia i interkambio kultural.
Korant na Aruba, Boneiru i Kòrsou tambe ta duna publisidat na tur aktividat di Arte di Palabra.
Logro di Arte di Palabra
Arte di Palabra ta stimulá mas hóben pa skirbi. Diferente hóben ku a presentá na e kompetensia ta sigui duna presentashon i sigui desaroyá nan abilidatnan kreativo. Na diferente skol a inkorporá skirbimentu di poema, kuenta i haiku den kuríkulo di papiamentu ta i algun skol ta tene preselekshon. Sin duda, e echo ku e kompetensia ta tuma lugá na Aruba, Boneiru i Kòrsou ta reforsá e lasonan di amistat entre e hóbennan di tur tres pais.
Ya kaba por nota ku e promé Pòtpurí Arte di Palabra di 2009 I e Pòtpurí Arte di Palabra di 2014, e diferente dvd-nan ku grabashon di e presentashonnan ta inspirá i stimulá mas hóben pa nan tambe produsí i presentá na papiamentu. Asina Arte di Palabra ta kontribuí na un género literario nobo na papiamentu: literatura di hóben pa hóben.