d 2017 Tapushi Literario
Baluarte 2017
Stimadó di papiamentu i famia di Arte di Palabra, bonbiní .
Esaki ta di diesocho aña siguí ku Arte di Palabra, kompetensia literario na papiamentu pa skol avansá, ta tuma lugá.
Manera ta kustumber lo rindi homenahe tambe na algun baluarte ku a duna un kontribushon balioso na nos idioma.
E aña akí e Tapushi Literario ta bai pa e siguiente personanan:
di Aruba: sr. Gregorio Tromp
di Boneiru: sr. Rudolf Domacassé
di Kòrsou: sra. Noris Doran i sr. Philip Rademaker
Seguidamente nos ke pidi tur hende pa lanta para, bati man, kanta i wapa ku nos yunan di tera, miéntras nan ta subi podio, ku akompañamentu di nos Kantadó mayó Rashid Felida i Quentin Brunken na barí.
Sr. Rudolf Domacassé
Arte di Palabra Boneiru 2017, a keda dediká na Rudy Domacassé, kende ta un persona ku a hasi hopi pa Boneiru, riba tereno kultural, artístiko i literario, i partikularmente pa idioma papiamentu. Rudy Domacassé ta tambe e persona skohí di parti di SKAL pa risibí Tapushi Literario durante Arte di Palabra ABC.
Rudy Domacassé, su enbolbimentu ku papiamentu a kuminsá komo mucha den e programa: Buskando Estrea di Radio Hoyer. E programa akí, meskos ku Arte di Palabra, tabata duna mucha oportunidat pa ekspresá nan mes kreativamente.
Den kurso di añanan, su dedikashon na papiamentu a krese i e mes a bai skirbi poema i kuenta kòrtiku, i skirbi pa korant Extra di Boneiru. El a studia pa dosente di papiamentu, komo tal el a traha 10 aña na Komunidat di Skol Boneriano. Tambe e ta duna kurso pafó di skol na diferente hende i organisahon. E aña akí e ta spera di finalisá su estudio komo Master di papiamentu na Universidat di Kòrsou.
Su enbolbimentu ku papiamentu a amplia i bai tambe riba otro tereno. Asina e tabata direktor i presidente di Grupo Teatral Boneriano, produsiendo diferente obra teatral.
Awor e ta miembro di direktiva di Fundashon Históriko Kultural Boneriano ( FUHIKUBO), ku entre otro ta organisá kurso i kompetensia tokante papiamentu i skirbimentu.
Sr. Rudy, danki di a aseptá e invitashon komo nos baluarte 2017. Nos ta spera ku pronto Sr. Rudy lo finalisá e estudio di Master di idioma papiamentu, pa asina nos sigui tende, lesa i disfrutá di obranan na papiamentu.
Sr. Gregorio Tromp
Komishon Arte di Palabra Aruba, durante di un reunion, a disidí ku sr. Ito Tromp ta e persona ku nan lo deseá pa haña e bunita rekonosimentu akí, pasobra “Ito Tromp ta un gran defensor di nos Cultura”.
Ito Tromp tabatin multiple di funshonnan impotante manera e.o.
*Miembro di Comision Arubano, Antiyano pa Standarisacion di Idioma
* Colaborador pa comision di diccionario basico Papiamento
* Miembro di comision Antiyano-Arubano pa ortografia di Papiamento
* Traductor di idiomanan Hulandes, Ingles i Spaño na Papiamento
*Docente di Papiamento na scol basico
* Productor i animador di programanan radial i social
* Miembro di grupo di komedia Mascaruba
* Productor di programa di television
* Narador di programanan filma riba video y
pelicula
* Ito ta aktivo ahinda riba tereno di traduccion i dunamento di les na Papiamento.
Pues mirando tur e multiple dedikashonnan akí, ta mas ku hustu pa otorgá Ito Tromp un rekonosimento spesial.
Sr. Ito Tromp, na nòmber di nos tur ku ta forma parti di Arte di Palabra ABC, un brasa fuerte, pa asina yama danki, pa e kontribushon balioso na nos idioma materno.
Noris Doran
Sra. Noris Doran a kuminsá su karera komo dosente na skol avansá. Entre e periodo di 1975 pa 2017, Noris a eksponé na nos un cv impreshonante. Un persona inkansabel, un luchadó ku stima su kultura. Un papiamentista di alma i kurason.
Nos a purba di hasi un kompilashon di tur su enbolbimentu ku idioma Papiamentu. (riba nos website por haña Noris su cv kompletu).
Riba tereno práktiko Noris ta:
Dosente
- Lider i entrenadó di Grupo Anakú-Kuumba
- Skibidó di guion pa Ruta Tula
- Deklamadó
- Inbestigadó kultural
- Desaroyadó di material na papiamentu pa skol
- Outor di: charla, diferente presentashon, homenahe, tayer
- Korektor di kuenta
- Revisor di buki i teksto
- Traduktor na FPI
- Eksaminadó pa Eksamen di Papiamentu pa strañero
- Outor di eksposishon di Papiamentu
- Outor di teksto manera: haiku, poesia, pensamentu, poema, proverbio
- Outor di teksto tokante historia di Papiamentu.
Bo no por papia di Noris Doran sin menshoná su Grupo Anakú-Kuumba, ku ta un grupo di hóben, ku ta deklamá na Papiamentu. Meta di e grupo ta:
1.Sera nos pueblo konosí ku obranan di nos outornan ku ta skirbi i kanta na Papiamentu.
Krea outornan konsiente i ku amor pa nos kultura.
- Stimulá hóbennan pa nan tambe deklamá i skirbi na Papiamentu.
Tanchi Noris, manera alumnonan ta bisa, danki i mas danki pa e aporte balioso na nos kultura i spesialmente na nos idioma papiamentu.
Noris , forsa pa sigui sembra pa nos kultura por sigui kosechá.
Philip Rademaker
Un yu di Kòrsou te den su igra…
Fifi ta un yu di Kòrsou hopi kreativo. E ta un artista ku ta dominá diferente disiplina. E ta un artista “all-round’, ku en prinsipio por tur kos. E ta deklamadó, poeta, aktor, direktor di esena, fotógrafo i pintor.
Fifi a aktua den pelíkula grabá na Kòrsou i den seri di televishon. Huntu ku grupo di teatro Thalia, el a trese hopi obra di teatro riba tarima.
Banda di esei el a publiká tres tomo di novela, poema i kuenta kòrtiku i dos di poesia. Su kolekshon di poema “Bos di Buriku”, ku 37 poema a keda publiká na aña 2000, i na aña 2008, FPI a publik’é, pa uso na skolnan sekundario.
Mas ku tur kos, e stima idioma. Papiamentu ta e idioma di su kurason, p’esei ademas di su publikashonnan e ta hasi masha tradukshon pa komersio òf instansia gubernamental, ku ta pidi su opinion tokante uso di Papiamentu. Tambe e ta publiká kasi tur dia riba medionan sosial, korigiendo òf konsehando tokante uso korekto di Papiamentu.
Nos ta sita Fifi Rademaker:” Mi ta skirbi riba tur kos, pero semper mi ke yega na e hende. Mi ke pa e hende bai ku mi riba un biahe di konsientisashon. Mi poemanan ta kòrtiku i dirèkt. Den e proseso di skibimentu, mi ta pisa kada sílaba, pasobra ritmo ta hopi biaha mas importante ku kontenido.”
Philip Fifi Rademaker, danki di a aseptá nos invitashon. Nos ta kontentu di a sera konosí ku un persona multi talentoso. Sigui usa e talento akí pa eduká, inspirá i motivá nos hóbennan.