Resultado final di Festival Arte di Palabra ABC 2019
Djasabra 18 di mei a tene final di Arte di Palabra ABC, kompetensia literario pa alumno di enseñansa avansá, na K-Center Kòrsou. E organisashon tabata den man di Komishon Arte di Palabra Kòrsou. E evento tabata den lus di e di 20 aniversario di Arte di Palabra na Kòrsou.
Na tur 40 finalista di Aruba, Boneiru i Kòrsou a partisipá ku sea un kuenta kòrtiku òf un poema. Despues di e himno di kada pais, Elvira Bonafacio a yama tur presente bon biní i a entregá un bunita muestra di apresio pa e di 20 aniversario na e miembronan di komishon Arte di Palabra. Minister di Enseñansa, sra. Alcalá-Wallé a hiba palabra yamando e delegashonnan di Aruba i Boneiru bon biní i a mustra riba desaroyo konstante di papiamentu i akuerdonan entre Aruba, Boneiru i Kòrsou. Despues di esaki e hóbennan di Aruba, Boneiru i Kòrsou a duna un tremendo presentashon.
Durante e evento a duna homenahe tambe na baluartenan di Aruba, Boneiru i Kòrsou. E Tapushi Literario ta bai pa persona ku ta duna un kontribushon balioso na papiamentu, e aña akí ku énfasis riba medio di komunikashon.
Kòrsou: sra. Renate Joe, sr. Cesar Palacios i sr. Arthur Tjin-Kon-Fat
Aruba: sra. Miriam Rosel-Koolman
Boneiru: sr. Ubaldo Anthony
Direktor di VSBO St. Jozef a entregá un plakat na komishon Arte di Palabra na okashon di e di 20 aniversario di e kompetensia. Na final di e kompetensia tabatin interkambio di regalo entre e delegashonnan di Aruba, Boneiru i Kòrsou. Tur partisipante i tur miembro di delegashon di Aruba i Boneiru a risibí e buki Pòtpurí Arte di Palabra 2019, ku lo ta disponibel tambe pa tur skol avansá di Aruba, Boneiru i Kòrsou. Finalmente Mervina Bilkerdijk a divulgá e finalistanan di e seis kategorianan. Banda di un regalo, e 6 ganadónan apsoluto a risibí un bunita trofeo diseñá i produsí pa sr. Frank Croes di Aruba ku tambe ta esun ku a krea e bunita logo di Arte di Palabra ABC.
Un danki spesial na tur esnan ku ta hasi posibel ku e fiesta literario akí por a tuma lugá pa di 20 biaha. Un danki spesial na e spònsornan prinsipal: Banco Maduro & Curiël’s, Fundashon pa Planifikashon di Idioma, Prins Bernhard Cultuurfonds Caribisch Gebied, i diferente otro persona i instansia ku kada un a duna un kontribushon balioso na e evento literario akí.
Riba e página di Facebook artedipalabra por mira grabashon i portrèt di preselekshon i final di Kòrsou i tambe final di Arte di Palabra ABC.
Un pabien na tur e hóbennan di Aruba, Boneiru i Kòrsou ku a partisipá, i tambe na e komishonnan di Aruba, Boneiru i Kòrsou.
Aki ta sigui nòmber di e ganadónan di e kompetensia di kuenta i poesia Arte di Palabra ABC.
Kategoria A: Poesia Eksistente klas 1-2
1. Quiarah Paulina di Maria College Kòrsou
2. Jo-anndric Mercera di SGB Boneiru
3. Edi-Sherray Antonia di Liseo, Boneiru
Kategoria B: Poesia Original klas 1-2
1. Jordan Martis di Gouv. Lauffer VSBO Kòrsou
2. Sulimar Martis di Gouv. Lauffer VSBO Kòrsou
3. Loui-Angelo Bislick di Colegio San Antonio Aruba
Kategoria C: Poesia Original klas 3-6
1. Dennzjelo Nassy St. Jozef VSBO, Kòrsou
2. Richaina Adamus Troeman di St. Jozef VSBO, Kòrsou
3. Rafael Garcia, Mon Plaisir College Aruba
Kategoria D: Kuenta Eksistente klas 1-2
1. Derickson Ellensburg di Joseph Civilis VSBO, Kòrsou
2. Naydjelly Sumter di Liseo Boneiru
3. Kyrsha Petrocchi di SKAIH, Kòrsou
Kategoria E: Kuenta Original klas 1-2
1. Wandel Jansen Polanco di Maria College Kòrsou
2. Cayley Figaroa di John Wesley College, Aruba
3. Darnica Pourier di SKAIH Kòrsou
Kategoria F: Kuenta original klas 3-6
1. Gyandro Marselia di MIL, Kòrsou
2. Kayla Gray St. Jozef VSBO, Kòrsou
3. Lyndon Leito MBO, Boneiru